Baruh Urang Dikaruni, Baruh Saurang Taung

Paribasa Banjar bamantik, baparnum, bakias, basa barinda. Adat budaya Banjar kada sagan bahimat diambung, tagal jangan jua dihapak—ditinggalakan. Kurang hantak, kurang surung, mau ai lucung. Katinggian maambung, mau ai malacung. Lamunnya dibuang, sayang pulang. 

Paribasa Banjar saku paling pas dibayah-bayah, diungkai, dikuya, dipandirakan pakai basa Banjar jua. Kurang-labih sama kaya paribasa Inggris, mau ai paling pas dipandirakan pakai basa Inggris. (Nang Tuha Dituha’akan, Nang Anum Disayangi, 29/05/2015.) 

Baruh Urang Dikaruni, Baruh Saurang Taung, isinya kumpulan paribasa Banjar nang suah jua sudah disiarakan Habar Banua TVRI Kalsel, Banjarmasin (2014-2016). Paribasa Banjar “warisan” urang bahari, pariannya bagus dijadiakan pipingkutan—pitua gasan sangu hidup—sagan urang (kakanakan) wayahini, nang sudah banyak kada tapi tahu di adat budaya urang Banjar bahari kala.